Xiriirkii hore iyo kan Hadda

 

Xiriirku waa haasaawe ku yimaada is afgarad labada qof, waana hindiso googol xaar u ah in nafqaybsiga labada qof. Hasaawuna waa wax soo jiraan ah, waa dibci is fahan oo Alle ku dhex beeray aadama kala jaaka ah. Dunida casriga ah ayaa fududaysay in haasaawaha hadda jira uu ka duwanaado kii hore, waxayna fududaysan in labada qof ay haasaawi karaan iyagoo aan is arag walina kulmin, halkii hore ee dhaqanka soomaalidu ahaa mid ka fool ka fool, mararka qaarna fariimo warqado iyo dhigaal ah loo adeegsan jiray marka dadku kala fog yihiin.

Haasaawihii hore

Haasaawihii hore wuxuu ahaa mid ka fool kafool ay isu arki jireen  labada qof ee sheeko wadaagta ah, bilowga xiriirkeeduna uu ka dhasho iyadoo xoolaha lala joogo ama ceelka la joogo, waqtigaasi wuxuu ahaa mid kooban oo ibo fur u noqda xiriir is balansi iyo kulankale loo ballaysimo. Wakhtiga ugu badan ay helaan ayaa ahaa habeenkii oo ah marka xoolaha iyo hawlaha kale la dhameeyo, waxaana la isku arki jiray ardaaga guriga inanta ama sida caadada ah waxaa la isku arki jiray fagaaraha ciyaaraha habeenkii lagu goolaaftamo ee barbaartu heelada ku tomato, waana halka ugu adag ee lagu kala garto ninka af-garooca ah iyo hadal yaqaanka af-kuxooglaha ah. Inta badan taasi waxay dhici jirtay xilliyada barwaaqada ah oo degsiimadu wadataal. Dhaqanka nooca ah wuxuu ahaa mid hufan oo laqdaba iyo isdaba marinta ka caagan. Labda iyagoo muddo is moog, haddana ballama iyo axdiyada la wada galo waa la ilaalin jiray, wuxuu ahaa dhaqan togan oo ku sallaysan dun wacnaan aad u qoto dheer.

 

Hasaawaha hadda.

Haasawaha hadda miyaga iyo magaaladu wuxuu noqday mid siman. Casriga iyo xadaaradda timid ayaa wax badan sababtay inay isla falgalaan. Waxaa laga simanyahay in labada qof xiriir dhex maro iyagoo aan is arag, isna aqoon, waxay sahashay in laba qof oo kala jooga cirif ilaa cirif ay sheeko wadaag noqdaan, sawir mooyee iyagoon si quman isu arag. Barbaarta inta wada joogta  waxay hadda isku arki karaan meesha ay wada ogol ugu ballamaan, waxayna is maqli karaan jeerkay rabaan, waana halkaa iyo meelo kale oo badan halka uu kaga duwan yahay haasaawihii hore. Aaminadda iyo isdaba marintu waa is barbar socdaan waana midkii Alle kugu beego , sidookale xagga hufnaanta wuu ka duwan yahay kii hore, waxaana keenaya marba casriga la joogo oo ah kan jaangooya marba sida uu noqonayo dhaqamada iyo ficilada bulshada markaa joogta.

Haddaba sida uu haasawaha laba xilli u kala duwaan ayaa guurkuna u kala duwanaa, haddana u kala duwan yahay.